Gmoablattl


Rosi und Alex - das Gmoablattl

Rosi: Ja bist jetza endlich da, - kumm hock di hea, ratsch ma no a bissl, - gehst heit a' auf's Starkbierfest?
Mei, 21zig Joah macht die Bürgergemeinschaft scho dös Starkbierfest;
Alex: Ja freili geh i da hie, - heia is doch schon des 21te moi! Und jedesmoi is die Bude voll,
oisa kommt's guat oh - bei die Leit
Rosi: Mei, i kann mi no guat erinnern, - dös erste moi, im Bitterwoifsaal, - Themen hamma g'habt, gleich Null;
Ozapft hat da Müller Harry, - S'Fassl hat gspritzt wia B-Schlauch von der Feuerwehr, so 60 Leit san's cirka gwen,
da Benz Klaus, die Ikone da erst'n Stund' hot mit seine Goaßlschneutzer d'Leut motiviert.
Und für d'Stimmung im Saal ham die Obermaxfelder Mooskrainer aufgspuid;
Drei moi samma beim Bitterwoif gwen und dann hamma in die Kübler Arena eizong - wei da Heinz aufg'heat hod
Alex: des war bestimmt a bissl aufregend - plötzlich innan so an groß'n Saal? I hab ja damals no net fortgeh' derfa,
da war i no koane sechzehn
Rosi: des war a Volltreffa, - von da ab war die Bude g'rammelt voll;
Alex: Jetz kann i mi no erinnern! Da hamm's dann einiges auf'd Fiaß gstellt, - Landfrauen ham Sketche g'macht
Über da Bühne hat "Au we zwick" aufgspuid - des muaß ja Super guat g'wes'n sei;

und was dene so ois eigfeun is, - da hätt'st manchmoi glei Scheiße schrein kenna; Rosi: Na und woaßt as no, - wia da Ziagla Norbert amoi den Pfarrer g'macht hod, - so a ungarische scharfe Beicht'
hab' i no nia g'heat! Ja, Red'n kann a scho guat, - ummasunst is a a net da erste Katoffe-Agrar-Vorsitzender
von de Königinnen-Erzeuger!
Alex: Du moanst vom Erzeugerring?
Rosi: Sag i doch!
Alex: Oisa, wia si dö Bürgergemeinschaft die letzt'n Joah ins Zeig g'legt hot - mit sei'm Stammpersonal,
dös is scho fänomenal!
Rosi: Woaßt as no, - wia da Edler Gerhard amoi an Aloisius g'macht hot, - ganz frohlockend hot a rum-zittert -
na net mit da Harfe, der hot zittert, weil a ohne Sock'n mit seine nackat'n Steckalfuaß auf da Bühne war.

Mei, i kann mi no guat erinnern, die erste Wahl - wer schafft's - Dino Harry da Bürgerliche oder
Schmitt'chen Gusti; natürli war de Gusti da klare Favorit; er hot's gelass'n g'numma, d'rum is
a zwoata wor'n und da dritte is da Mosch Karl wor'n, - da Lui de Vone von Königsmoos,
da warst beim Zeitungsles'n glei übarascht, wenn a amoi net drin g'wesn is, so populär is dea
- g'wenn - des bringt net amoi da Benz Klaus in da Weihnachtszeit zamm;
Alex: Aber des muaß ma scho amoi sag'n - do wo da Mosch Karl sei hat müaß'n, da is a g'wesn,
dös hab'n andre mit "Rang und Nama" nöt imma wahrgnumma.
Rosi: Genau
Alex: Woaßt no wia Gusti mit ihra Schlagkraft, - des erste Fassl ozapft hod, - 3 Schläge und koa Spritza daneb'n
Rosi: Mei, dös is hoit a Frau gell! do tröpfelt seltn was daneb'n
Alex: Und was die immer für zünftige Reime parat g'habt hod; pravurrös. Aba bei manchen Starkbierfest'n
da war'n scho richtige Klassiker dabei, - ja echt, der erste Fastenprediger - da Aigner Erhard,
wias den z'ammgricht ham, wia an Don Camillo - und seine Dablecka war'n a net "Pep-ohne"
da ham scho manche eana Fett abgriagt - und ois is wahr g'wen.


Rosi: Wer a gouß rauskomma is, - unser fränkisches Naturtalent, da Rebhan - dös bayrische Unikum.
Ob's ois vastand'n hab'n, - g'lacht ham's
Alex: Da Pelzig häd g'sagt - genau, dös bin i; Und die Starkbierolympiade, dö hod ei'gschlagn,
erste Halbe Bronze, zwoate Silber und ab drei Gold. Bei dö Männer haut des scho hie -
aba uns Frau'n - manche haut's um.
Rosi: Dös kamm a ja vasteh' - wo genga mia Frau'n scho hie? Eikauffa, wasch'n, putz'n, bügl'n
vielleicht a moi a Schnapserl bei a Geburtstagsfeier - dö Männer: Feierwehrübung,
Sportplatz, Bauernstammtisch, undsoweida - do gibt's allawei was zum dringa -
die Eichungen fehl'n uns hoit einfach, - aber es gibt a Tage, wo dös schwache
Geschlecht guat mithoit'n ka;
Alex: Ja, beste Grüße an die Landfrau'n - was is denn no ois passiat? - Ja genau
die "Alt-Neuhauser-Feierwehr-Kapell'n" - mit oide Feierwehr-Uniformen san's ei'maschiad

a jeda hot was anders gspuid, - aba a mords Gaudi is gwen - wia dö ausg'schaut hab'n.
Rosi: Mei, woaßt as no, bei dera gigantisch'n Bürgamoasta-Wahl, - g'rammlt voi war da
Kübla-Saal; dö Stimmung war hoch, - Personen war'n da, dö war'n sonst nia da,
a Euphorie war dös, - glei fünfe hab'n sie aufstell'n lass'n; sämtliche Arten und Rass'!
da Heini war auf d'raht wia a Schweibal, sogar a Guckuck flog übas Donaumoos -
a fränkisches Rebhändl mit angeschlagenen Federn; Flocki der weiße Eisbär,
sogar a nächtlicher Überflieger aus Ulm - I häd mi ja damals a gern aufstell'n lass'n
aba Gusti hod gsagt, dafür hätt i z'weng G'wicht! Darawei hätt i do mindestens
20 Kilo mehra g'habt wia da Heini; bei dem Wahlkampf hod sö Gusti ganz schö
in's Zeig g'legt - Wenn i do an dös Plakat denk - Gusti als Skwoo von dö Apatsch'n
mit Winnetou und Trapper Oldschättahänd; - dös war a Buidl - vo sowas hod
damois da gloa Karli vom Großstadt-Revier - aba vo dene hätt sie ja damois
koana traut - an Karl den Heranwachsenden seine 99% zu stoppen -
aba mittlaweile hab'n die 64ge a moi g'langa müaß'n - I bin a weng vom Thema
abkumma - wo bin i denn glei stehblieb'n? Ah ja, wia dann unser Obahäuptling
Bürgamoista woan is - da ham's sie dann alle Gemüter wieda beruhigt
Beim danach folgenden Starkbierfest, da hot a o'zapft, ois wenn er no nia was
anders g'macht hätt' - mit oana solch'n Rückhand - unglaublich.
Wia dann der Kübla-Saal aus allen Näht'n platzt is und wegen Einsturzgefahr,
dann san's in die Donaumooshalle übersiedelt; und alle Beteiligten ham wieda
Voigas geb'n
Alex: Mei, woaßt was mir a so guat g'falln hot - die drei unbezwingbaren Tenöre,
wia di schwungvoll g'sunga ham, daß an Tobi glei aus die Schua rausg'haut hot,
da hot da Leo g'schaut, was der für an Abflug hing'legt hot -
Rosi: Ja, dös hätt'ns besser a'schraub'n müaßn, a Lehmeier is scho gewichtig auf da Bühne
Apropo G'wicht; - damals bei den G'wichtszunahmen der Bauernstammtischler
"Alias Moosbiker" - de dean heit' ah scho mehr Bikern als Stammtischsüffln -
so viu vatrag'ns nimma - beim Wieg'n hab'ns damals g'wonna
Alex: Aba net wega die Schweinshaxn und dem Starkbier, na na - da ham einige
G'wichte mit ei'gschleußt; Eis'nplattn, Buidog-Anhängerkupplung - ham's in die
Hos'ntasch'n g'steckt - so ham di Bazi innerhalb von 4 Stund' an Zentner mehr g'wogn,
Hund' san's ja scho, gell
I glaub' die Donaumooshalle is scho guat für sowas - d'Königsmooser Musi kann si
voll entfalten; da Jakob und da Reinhold kenna voll aufspuin und Platz zum Tanz'n is gnua da;
an Kramlich sein Schnaps geht weg wia warme Semmeln, ja was meng ma denn mehra
und's Programm passt a immer
Rosi: Jed's moi a volles Haus, gell - mei, was sagst zu unsrer Bavaria Königsmoos,
was de für an Outfit hod; und eine Ruhe strahlt die aus, - do is unser Fastenprediger
scho froh, dass a so a Schönheit neben sich hod, - ja und ausserdem duada sich da
leichta, wenna seine Moral und Geschehen predigen an den Mann bringen darf:
sie is für das Feine - er mehr für das Härtere
Alex: I hoff doch, dass uns no lang erhalt'n bleib'n; weil sei Statur und sei kräftige Art, -
die hot scho was! "Hart aber fair"
Rosi: Weilst jetzt grad sagst "hart aber fair" bei da letzt'n Wahl hot doch da Heini a leichtes
Heimspiel-Renna g'habt, ganz alloa hot a Punkt'n kenna; koan Gegenspieler -
des aufregenste bei der Wahl war dann, wer kummt in den Gemeinderat!
A starka Burgamoasta braucht a starke Unterstützer! Dös a bissl "Feistling"
hinta de Ohr'n hab'n und so san viere von da Bürgergemeinschaft nei g'wählt wor'n.
Alex: Ja lauta standhafte Kerl;
Rosi: Klink, da Feierwehr-Häuptling und Milchziegenexperte, Edler da Kartoffe-Spezialist und
Deutz-Aussteiger, Bolleininger da Schweinebaron und Betriebswirt Gülle Schonglör
und Bürgergemeinschaft-Neueinsteiger Feistling, hoffentlich kummt a net ins Schleidern,
net dass a dö Königsmooser Musi mit da Blaskapell'n vo Ehekircha vawechselt
Alex: Eigentlich is ja schon schö bei uns gell, ois lauft guat, unsa Heini is standfest wia a
Kriagadenkmal, unsa Zwoata, da Hubert a reeller Klingsmooser mit Herz und Scharm
und unsa dritter da Bürgergemeinschaftsvorsitzende der endlich eig'segn hot, dass
a g'scheida Bauer an Fendt foat; Oisa, was meng ma denn mehra?
Rosi: Aba woaßt, i hab immer no a bissl a Handicap, frühra, wenn i mit da Gusti imma g'red hab,
do hob i immer g'sagt: "Du Gusti , Du" i kann do net sag'n, "du Heini du"?
Alex: Na, dös kannst net so einfach sag'n ... aba dann sag hoit - Du Heini, "kannst" du ...
und scho warst aus'm Schneida
Rosi: Genau, so mach is
Wichtig is, dass no viele Jahr imma wieda hoaßt: Ozapft is! Und da Benz Klaus mit sei'm
Funk-Mikro durch die Halle saust und seine Sprüch loslasst ...
Alex: Und uns die rasende Reporterin "Karla Columna" Zeitungsberichte bringt, dann
werd'ns wieda alle sagn: Schö is gwen
Rosi: Mia dat ja no sovui eifoin, aba i muaß jetza Feiaomt macha - net dass mia zwoa
no z'spät zum Starkbierfest kumma, oisa Servus bis späta und bleibt's sauber!